Gin-umpisahan ang operation baklas sang Commission on Elections (COMELEC) – Bacolod sa bahin sang Brgy Singcang-Airport tubtob sa Downtown area.
Sa interview sang Bombo Radyo kay Atty. Revo Sorbito, Bacolod City Election Officer, nag-umpisa sila sa pagpangbaklas kaina alas- 8:30 sang aga sa bahin sang Brgy Singcang-Airport tubtob nga gin-usoy nila ang dalan padulong sa downtown area.
Suno diri, matapos ang ila pangbaklas, mabalik man sila sa opisina bangod may iban pa sila nga trabaho.
Apang, nagpasalig naman ini nga ila libuton ang bilog nga area sang ciudad tubtob nga matapos ang election.
Samtang, wala naman ginakakas ang mga posters sang local candidates bangod sa Marso 28 pa man maumpisa ang local campaign period.
Sa karun, ila na i-inventory ang ginpangkakas nga mga posters kag ipadala sa main office ang report kag ang national office na ang madesisyon kun ang tikang nga ihatag.
Sa pihak nga bahin, peace and order ang mahatag sang Negros Occidental Provincial Police Office samtang ginapatigayon ang operation baklas sang Commission on Elections.
Sa interview sang Bombo Radyo Bacolod kay Police Captain Judesses Catalogo, mahatag sila sang security kag peace and order sa mga election officers samtang ginapatigayon ang operation baklas sa mga illegal campaign materials.
Suno diri, magakoordinar lamang ang election officer sa kapulisan agud mapahibalo ang ila aktibidad sa pagpangbaklas sa mga illegal campaign materials.
Samtang, nag-upod man ang Bacolod City Police Office sa pagpatigayon sang operation baklas sang Commission on Elections para sa May 2025 elections.
Sa interview sang Bombo Radyo Bacolod kay BCPO Director Police Col. Joeresty Coronica, kaina sang aga nag-upod ang BCPO sa COMELEC- Bacolod kag COMELEC- Negros Occidental sa operation baklas.
Suno diri, kalabanan sa ila mga ginpangkakas amo ang posters sang mga Senador kag Partylist representatives nga nabutang sa indi designated posters area sang COMELEC.
Iban sa mga posters ang kahapon lang ginbutang apang ini ang ginkuha gilayon kaina sang aga.
Pahayag ni Coronica, yara ang kapulisan para maghatag sang seguridad sa mga comelec officials pananglitan nga may magluntad nga kinagamo sa pagpangbaklas sang campaign materials.
