Ginaalegar nga nagbalik sa operasyon sang iligal nga druga ang gin-patay nga self-confessed bagman sang Berya drug group nga si Ricky Serenio.
Ini suno kay Bacolod City Police Office (BCPO) Director Police Colonel Henry Biñas matapos nakuha sa salakyan ni Serenio ang pila ka mga notebook nga may listahan sang iya mga katransaksyon lakip kun sin-o ang iya sulukton kag dapat nga suplayan upod man ang pila ka bank book nga milyones ang unod.
Suno kay Biñas, ang narekober nga notebook kay Serenio ang kaangay sang typical nga listahan nga masami nila marekober sa mga durugista.
Sa karun, indi pa makapadalom gid si Biñas sa paghatag sang detalye sa insidente bangud nagapadayon pa ang ila imbestigasyon.
Samtang ginapasiguro sang BCPO director sa pamilya ni Serenio nga handa sila magbulig sa mga ini kun luyag nila magpasaka sang kaso.
Wala nagaguwa sa pinakaulihi nga monitoring sang Philippine Drug Enforcement Agency (PDEA) Region 6 ang ngalan sang ginpatay nga self-confessed bagman nga si Ricky Serenio.
Ini ang pahayag ni PDEA 6 Director Alex Tablate matapos ginpahayag sang Bacolod City Police Office kag Police Regional Office 6 nga nagbalik sa pagbaligya sang iligal nga druga si Serenio.
Suno kay Tablate, indi kitaon si Serenio sa ila monitoring sa nakaligad nga binulan indi kaangay sang una.
Samtang nagapati si Tablate nga posible lansihanay man sa iligal nga druga ang motibo sa pagpatay sa self-confessed bagman sang Berya drug group bangud suno diri, mismo ang mga durugista man kun kaisa ang nagapinatyanay kun indi insakto ang ila mga transaksyon.
