BACOLOD CITY — Ginpaandaman ni Bacolod City Police Office Director Police Senior Supt. Jack Wanky ang operator sang Peryahan ng Bayan nga pagadakpon ang ila mga koridor nga madakpan nagapataya bangud ini ang makabig nga illegal numbers game.
Sa interview sang Bombo Radyo, gintumod ni Wanky ang operator sang nasambit nga numbers game nga amo si Edgar Millama, nga mas kilala sa hayu nga Tulikoy, nga sang damlag lang nagpabutyag nga liwat magapataya ang Peryahan ng Bayan.
Apang suno kay Wanky, mismo si Philippine Charity Sweepstakes Office (PCSO) Jose Jorge Chairman Corpuz na mismo ang nagpahayag nga ilegal ang nasambit nga pataya bangud wala ini sang nagakaigo nga permit.
Bangud sini, suno sa BCPO director, ang sin-o man nga madakpan nga nagapataya sang Peryahan ang pagadakpon sa paglapas sang Anti-Illegal Gambling Law.
Samtang, wala naman sang plano si Wanky nga ipatawag si Millama agud maistoryahan ang liwat sini pagbukas sang operasyon.
Nahibaluan nga si Senior Supt. Wanky ang nagpapanaog na sang memorandum sa tanan nga police station commanders sa ciudad sang Bacolod nga tutukan ang nasambit nga numbers game.
