Magapakig-angot ang Bacolod City Police Office sa Negros Occidental Police Provincial Office agud masolbar ang pagpatay kay Brian Mark Agillo sa Hacienda Manaol, Barangay Matab-ang, Talisay City sang Hwebes sang kaagahon.
Si Agillo, 33-anyos, may live-in partner kag tatlo ka mga kabataan kag residente sang Hernaez Street, Brgy. 36, Bacolod City.
Siya ang gintiro sa sulod sang van kag ginapatihan nga kaupod man sini ang suspetsado.
Sa interview sang Bombo Radyo kay Bacolod City Police Office Director Police Col. Noel Aliño, iya nabalitaan nga nagapuyo sa siyudad sang Bacolod ang biktima gani luyag sini magkooperar sa NOCPPO sa pagsolbar sang kaso.
Ginmanduan man sini ang Intelligence Unit kag investigator sa pagtrabaho sa kaso kasubong man nga nagkoordinar ini sa Talisay City Police Office sa pagkuha sang update.
