Ginpasiguro sang Bacolod City Police Office (BCPO) nga maga-patrolya sila bwas agud mapasiguro ang kalinong kag katawhay sang Valentine’s Day.
Sa interview sang Bombo Radyo Bacolod kay P/Lt. Ma. Liberty Indiape, spokesperson sang BCPO, ginpahayag sini nga magalibot gid bwas ang kapulisan kag mapahamtang sang mga pulis sa sagwa sang mga hotel, motel kag restaurant agud magbantay kun napatuman sang husto ang health protocols.
Suno kay Indiape mabutang man sila sang mga police assistance desk kag police visibility sa mga pampubliko nga lugar agud mapasiguro nga wala sang magluntad nga krimen kag may mapalapitan nga pulis ang mga luyag magpangayo sang bulig.
Suno sa iya, tinguhaan gid sang BCPO nga mapatigayon sang malinong kag matawhay ang Valentine’s Day.
