Nagarequest ang Bacolod City Police Office sa Bacolod City Government nga ma-institutionalized ang pila ka mga tikang nga ginalantaw makapahagan-hagan sa mataas nga demand sang illegal nga droga sa ciudad.
Madumduman nga dalagkuan ang balor sang illegal nga droga nga narecover sa ciudad pa lamang sang Bacolod halin sang Disyembre 2024 tubtob subong nga Enero 2025.
Halin Disyembre 15 tubtob Enero 5, nakakumpiskar sang balor P25.6 million nga shabu sa bilog nga Western Visayas, samtang P16.5 million diri ang narecover sa Bacolod City.
Sa pahayag ni BCPO Director Police Col. Joeresty Coronica, ini ang whole of nation approach kun sa diin ang mga kapulisan ang magadakop sang mga nagabaligya, samtang nagapanawagan sa City Council nga mahimuan man sang ordinansa ang mga tikang nga makapanubo sang demand sa illegal nga droga kaangay sa pagpasanyog sang information drive.
Ginakasubo ni Coronica nga sa karun, kaangay nga ginakonsiderar na nga negosyo ang illegal nga droga.
Ini ang attractive nga negosyo sa masami para sa mga wala naka-eskwela kag wala sang trabaho.
Gani sila ang nagapakig-angot sa City Government nga makahimo sang ordinansa nga mapasanyog pa ang pahanumdom sa mga eskwelahan tuhoy sa negatibo nga konsekswensya sang illegal nga droga.
Apang nagapati ini nga ang dapat mas matutukan nga ma-educate amo ang mga out-of-school youth nga masami nagaka-involve sa paggamit sang illegal substance.
Suno diri, kalakip sa masami rasun kun ngaa naga-engage sa paggamit sang illegal nga droga ang mga kabataan nga nagarebelde, mga ginpabay-an, may sobra-sobra nga allowance, bangod sa pressure sa barkada kag impluwensya sang environment.
Dapat nga mapahibalo sa mga ini ang risgo sa paggamit sang illegal nga droga, kasubong man ang mga penalidad.
Suhestyon man ni Coronica nga dapat mahimuan man sang programa nga mahatagan sang palangabuhian ang mga makatapos sa rehabilitation agud indi na magbalik.
