Magahulat lang ang Bacolod City Police Office (BCPO) sang opisyal nga dokumento gikan sa higher command tuhoy sa mando ni Presidente Rodrigo Duterte nga dakpon ang mga nagasuyop sang vape sa pampubliko nga lugar.
Suno kay Police Lt. Colonel Ariel Pico, spokesperson sang BCPO, bisan nga may mando na ang presidente, may yara man sila sa gihapon sang matag-as nga opisyal nga dapat sundon.
Ginalauman na ni Pico nga sa sini nga mga tikang, madamo na naman sang magalain ang buot sa kapulisan kun sila ang madakpan.
Apang ginpanindugan sini nga himuan lamang nila ang ila trabaho.
Martes sang gab-i, ginmanduan ni Duterte ang law enforcers nga dakpon ang mga naga-vape sa pampubliko nga lugar kadungan sang announcement nga igadumili na niya ang paggamit kag importasyon sang produkto bangud sang malain sini nga epekto sa ikaayong lawas sang publiko.
Sa iya nga press conference sa Malacañang, ginpahayag ni Presidente Duterte nga dumilian na niya ang vaping sa Pilipinas bangud indi ini maayo sa publiko.
Suno sa presidente, may yara sang mga kemikal ang vape nga may indi mahibaluan nga epekto sa lawas kag wala pa ini nakapasar sa Food and Drug Administration.
Sang damlag lang, ginkumpirmar sang Department of Health nga isa ka 16-anyos nga babaye gikan sa Visayas nga nagsugod sang pag-vape sang Marso sini nga tuig, ang nakaangkun sang lung injury.
Suno kay Health Secretary Francisco Duque, nagapakig-angot na ang Research Institute for Tropical Medicine sa hospital agud makatipon pa sang dugang nga specimen gikan sa teenager kaangay sang iya dugo, plema, kag higko ukon stool para sa eksaminasyon.
Suno sa DOH, posible nga matapos ang eksaminasyon sa masunod nga duha ka semana.
Miyerkules sang gab-i, ginpaandaman naman ni Duterte ang mga huwes nga magabalabag sa iya mando nga dumilian ang paggamit kag importasyon sang electronic cigarettes ukon vape.
Sa iya nga speech sa 80th anniversary sang Department of National Defense sa Quezon City, ginpahayag sang presidente nga dapat ipatuman sa gilayon ang iya direktiba samtang pending pa ang executive order.
Ginpaandaman ni Duterte ang mga judges nga indi mag-issue sang restraining orders saCustoms kag sa Coast Guard.
Ginpahayag sang presidente nga indi siya magsunod sa order sang mga judges bangud sang pinasahi karun nga sitwasyon sang pungsod.
Suno pa sa presidente, may yara na nga daan sang kasuguan nga nagadumili sa pagpalapta sang mga toxic materials sa pampubliko nga lugar.
