BACOLOD CITY — Ginpasalig sang Bacolod City Police Office nga hatagan sang impartial investigation ukon patas nga pag-usisa ang kamatayon sang 17-anyos nga sulterito nga gintiro sang isa ka pulis sa daan nga airport sang Oktubre 19 sang hapon.
Sa interview sang Bombo Radyo kay BCPO spokesperson Police Senior Inspector Armelyn Vargas, ginpahayag sini nga magahatag man sila sang assistance sa pamilya ni Archie Filonco Odsigue agud nga mapatigayon ang pagpasaka sang kaso.
Suno diri, nakakadto na sa Women and Children’s Protection Desk ang pamilya Odsigue kag nahatagan naman sila sang pangalan sang pulis.
Ginkumpirmar man ni Vargas nga nagaduty pa sa Bacolod City Police Station 8 si PO2 Ryan Sagon.
Paathag sini, wala pa sang kaso nga napasaka batok kay Sagon rason nga indi pa makadagdag ang BCPO sang administrative sanction.
Sa tion nga makasuhan na ini, diri na kag mahibaluan kun ano ang masunod nga tikang sang city police office.
Suno kay Vargas, siya kuntani mismo ang mahatag sang impormasyon tuhoy sa natabo sang Oktubre 20 apang tuman sila kasako sa MassKara Festival.
Kaangot sini, ginpamilit sang station commander sang Bacolod City Police Station 8 nga legitimate ang operasyon sang iya mga tinawo sa old airport sa Barangay Singcang nga ginkamatay sang 17-anyos nga sulterito.
Nahibaluan nga ginaalegar sang iloy ni Archie Odsigue nga gintiro sang isa ka pulis ang iya anak sang ini ang nagdalagan samtang sa spot report naman sang Police Regional Office 6, nag-ricochet ukon nag-umpok lamang ang bala sang nag-warning shot si PO2 Ryan Sagon kag nag-igo sa likod sang iya ulo.
Suno kay Police Senior Inspector Wilfredo Benoman, ginkustodiya na ang natungdan para sa imbestigasyon.
Nakabutang sa affidavit sini suno kay Benoman nga nagbalos lamang si Sagon matapos nga una nagpalupok si Odsigue.
Nagbalibad si Benoman nga hingadlan ang iya tinawo apang iya ginkumpirmar nga padayon ini nga naga-duty.
Indi man niya mabuyagyag kun sanday sin-o ang lima ka iban pa nga pulis nga nagresponde sa daan nga airport.
Panindugan sini, wala niya ginatabunan ang hitabo apang ginatugyan na niya sa Women and Children’s Protection Desk ang imbestigasyon.
