Naga-apelar ang tagpamaba sang Bacolod City Police Office (BCPO) sa mga barangay officials nga magbulig sa pagpahibalo sa mga pumuluyo nga sa community firecracker zone lang pwede makapalupok kadungan sa pagsaulog sang Bag-ong Tuig.
Sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga indi na basta-basta makapalupok subong sa mga ugsaran bangud nga pwede mapriso ang mga ini sang anom ka bulan tubtob isa ka tuig kag may multa nga 20 mil tubtob 30 mil pesos.
Suno kay Pico, dapat nga magbulig gid sa information dissemination ang mga barangay agud nga wala sang may magbayolar sa pagsulundan.
Dugang pa sini nga may yara sang 66 ka mga community firecracker zone sa Bacolod.
Ginpasiguro man ni Pico nga naka-full alert status ang kapulisan halin sang Disyembre 1.
Samtang, liwat naman nga nagpahanumdum si Executive Assistant to the Mayor Ernie Pineda sa publiko nga sa designated area lamang magbakal sang palupok nga nahamtang sa Pope John Paul II tower.// Suno kay Pineda, indi magbakal sang mga palupok sa mga higad-higad bangud sarang ini nga madakop kag mapriso.
