Hulaton pa sang Bacolod City Police Office (BCPO) ang mando sang Local Inter-Agency Task Force angot sa mga pagahimuon kadungan sang pagpatuman sang duha ka adlaw nga “Time-out weekend” para sa mass testing sa Agusto 28 tubtub 29.
Sa interview sang Bombo Radyo Bacolod kay BCPO spokesperson Police Lt. Col. Ariel Pico, ginpahayag sini nga santo sa ginpahayag sang Deputy City Director for Operations nga si Police Lt. Col. Lester Leada, kaangay sang pagbalik sa Enhanced Community Quarantine (ECQ) ang matabo sa duha ka adlaw bangud ibalik ang pito tubtob siyam ka mga outer border controls kag 27 ka mga inner border control kag ang makagwa lamang ang may yara sang Home Quarantine Pass (HQP).
Apang padayon nga magabukas ang malls, botika kag padayon man ang public transportation.
Apang gin-athag man ni Pico nga hulaton man nila sa gihapon ang mando sang local IATF bangud indi man nila luyag nga pangunahan ini.
