Nagahulat nalang sang direktiba ang Bacolod City Police Office (BCPO) gikan sa Police Regional Office 6 kun magapatuman sang muzzle taping sa mga armas subong nga holiday season.
Suno kay P/Lt. Col. Ariel Pico, spokesperson sang BCPO, daku ang tsansa nga indi magpatuman sang muzzle taping bangod wala man sang patigayunon nga holiday ceasefire ang mga kapulisan.
Dugang pa ni Pico nga gina-ekspektar man nila ang dalagko nga police operations gani delikado kun nakamuzzle tape ang mga armas.
Samtang nagpasalig man ini nga yara sa full alert ang mga kapulisan bilang kabahin sang preparasyon sa seguridad subong nga holiday.
May natalana naman nga deployment plan sa mga personnel ang BCPO indi lang sa mga shopping malls kalakip na ang downtown areas kag iban pa nga mga lugar.
Kalakip man sa pagabantayan sang mga ini ang mga natalana para sa mga fireworks community displays.
Pahanumdom ni Pico sa mga personnel sang BCPO nga apisar wala sila nalakip sa maga-obserbar sang holiday season, dumdumon nalang nga yara sila sa full alert status kag unahon gid ang serbisyo sa mga pumuluyo.
Panugyan man sini nga kooperahan ang mandu sang city director nga pagbantay sa Simbang Gabi kasubong man ang kahilwayan sa bilog nga Disyembre agud mapanubo ang krimen sa ciudad sang Bacolod.
