Nagahulat pa ang Bacolod City Police Office (BCPO) sang direktiba ukon memorandum circular nagikan sa regional office angot sa pagpanagtag sang second tranche sang Social Amelioration Program (SAP).
Madumduman nga ginpahayag ni Presidente Rodrigo Duterte nga itugyan an sa AFP kag PNP ang pagpanagtag sang second tranche sang SAP.
Sa interview sang Bombo Radyo Bacolod kay BCPO spokesperson Police Lt. Col. Ariel Pico, ginpahayag sini nga nakahanda na ang mga ini sa pagtuman sang direktiba.
Bilang preparasyon antes pa sang pagpanagtaganay, siguruhon sang katapo sang Philippine National Police (PNP) nga may yara sang inter-agency coordination sa iban nga ahensya sang gobyerno bangud indi lamang ang PNP, armed forces kag DSWD ang mahimo magpatigayon sang pagpanagtag sang SAP.
Ginpahayag man sini nga dapat iplastar man sang mga barangay officials ang patakaran sa indi makabaton antes pa man ang pagpanagtag agud may transparency bangud madamo ang mga pigado sa ciudad.
Ginpahayag man sini nga mas mahapos magpatuman sang direktiba kun ginplano kag siguruhon man sang ahensya nga ipatuman ang minimum health protocols kag ang ginpasar nga ordinansa sang siyudad nga mandatory ang pagsuksok sang facemasks kag pag-obserbar sang social distancing.
Nagpanawagan man ini sa mga pumuluyo nga magbalon sang pagkaon, tubig kag malaba nga pasensya bangud ginalantaw na sini nga malaba ang pila bangud sa ginapatuman nga health protocols.
