Nadeploy na sang Bacolod City Police Office ang Tactical Motorcycle Riding Units (TMRU) nga nagalibot sa kadalanan sa ciudad.
Madumduman nga kasunod sang serye sang patyanay nga kahimuan sang riding-in-tandem suspects sa Bacolod, ginmandu ni Police Regional Office 6 director Brigadier General Rolando Miranda ang pagpasangkad sang police visibility sa ciudad.
Suno kay BCPO spokesperson Police Lt. Liberty Indiape, nagsugod na sa pagduty ang TMRU kasunod sang accounting nga ginpatigayon kag pagtalana sang magapamuno sa unit.
Ang TMRU suno kay Indiape ang naga-augment sa mga police station kag natunga sila sa duha ka shift agud nga may nagalibot 24 oras.
Masobra 10 ka police personnel suno sa iya ang naassign sa TMRU nga yara sa idalom sang Mobile Patrol Unit.
Ang TMRU ang nagapangsita sa mga nagaangkasanay sa motorsiklo ilabi na kun gab-i, nagatsekyar man sa papeles sang mga motorista kag nagapangsita sa nagalapas sa minimum health protocols.
Ginalauman naman nga makadugang ang BCPO sang units sa TMRU bangud ang iban nga kapulisan ang may yara man sang kaugalingon nga motorsiklo.
