Nagpaandam ang Bacolod City Police Office sa mga personnel nga indi magreport sa police station sa Disyembre 31.
Nahibaluan nga tinalikdan pa nga semana nakafull alert status ang mga kapulisan para sa nagahilapat nga pagsug-alaw sang bag-ong tuig.
Sa interview sang Bombo Radyo kay Bacolod City Police Office spokesperson Police Lieutenant Colonel Ariel Pico, ginpahayag sini nga humalin pa sang Disyembre 15 tubtob Enero 5 tuig 2020 nga nakafull alert status ang mga kapulisan, santo sa mando sang officer in charge nga si Police Lt. General Archie Gamboa.
Bangud sini, dapat 100 porsyento ang nakaduty sa pagsug-alaw sang bag-ong tuig kag kanselado ang mga leave sang mga pulis, magluwas sa sick leave.
Sa karun, may yara sang 75 porsyento nga nakaduty samtang 25 porsyento sang personnel ang naka-on leave apang pag-abot sang Disyembre 31, sila ang obligado nga magreport sa malapit nga police station sa ila lugar.
Dugang pa sini, ang hepe sang kada estasyon ang dapat magmonitor sang ila personnel agud masiguro nga ginasunod sang mga kapulisan kag kabahin ini sang iya command responsibility.
May yara man sang ginasunod nga due process sa pagpina sa mga station commanders nga wala nagasunod sa mandato.
