Nagapanawagan ang Bacolod City Police Office nga likawan ang prank call kag kompletohon ang impormasyon kun magtawag sa emergency hotline 911.
Madumduman nga ginlunsyar sang Bacolod City Police office ang SAFE NIR Dial 911 sang Hunyo 4 nga nagatuyo nga mapadasig ang pagresponde sang mga kapulisan sa mga emerhensiya.
Sa interview sang Bombo Radyo kay BCPO Spokesperson Police Captain Dax Santillan, gin-athag sini nga mahimo sagihapon nga makatawag sa 911 bisan nga wala sang load basta may ara lang sang signal.
Gani, ginapanawagan sini nga kun may katalagman nga masaksikhan kaangay sang kriminalidad, aksidente, emerhensya ukon makaduluda nga persona nga magtawag sa 911 agud gilayon nga marespondehan.
Pahanumdom sini nga indi himuon nga lahog-lahog ang pagtawag sa 911 bangud isa ukon duha lang ka tawag posible nga mablock na ang number kag indi na magamit sa insakto nga kinahanglanon.
Paathag ni Santillan, ang tawag ang mabaton sa Manila kag i-relay sa pinakamalapit nga police station gani kinahanglan kompleto ang tanan nga detalye kaangay sang lugar, pangalan kag kun ano ang ginapangayo nga bulig.
Gina-encourage man sini nga magkuha sang video apang dapat unahon gid nga magtawag sa 911 antes mag-post sa social media.
Pahayag ni Santillan nga tinutuyo sini nga programa nga masiguro ang kaluwasan sang tanan nga pumuluyo sa bilog nga Negros Island.
