Nagpahanumdom ang Bacolod City Police Office nga may yara sang mga penalidad kun indi malab-ot sang isa ka pulis ang nakatalana nga body mass index.
Sa interview sang Bombo Radyo kay BCPO spokesperson Police Lieutenant Colonel Ariel Pico, ginpahayag sini nga kun indi malab-ot sang isa ka pulis ang BMI, mahimo nga indi ini mapromote sa mas mataas nga posisyon ukon maka-avail sang mga career schooling.
Suno kay Pico, nagapatigayon sila sang mga physical activities kaangay sang Zumba sa headquarters sang BCPO kada Martes kag Huwebes sang hapon bilang kabahin sang Biggest Loser Program.
Ginpaathag man sini nga indi lang ini para sa mga obese bangud bukas man ang nasambit nga aktibidad sa mga underweight personnel.
Suno sa iya, may mga pulis nga may yara sang high blood, diabetes kag may mga edad na gani indi tuman ka bug-at ang mga aktibidad nga ila ginapatigayon.
Nagpangagda man ang spokesperson sa mga sibilyan nga luyag mag-intra sa ila ginapatigayon nga Zumba.
Suno kay Pico, ang programa nga Biggest Loser ang parte sang internal cleansing sang Philippine National Police (PNP).
