Nagpanugyan ang city director sang Bacolod City Police Office sa mga kabataan nga nakaeksperyensya sang bullying nga magpanugid.
Ini ang kasunod sang natabo nga pagpangluthang sang duha ka menor de edad sa San Jose National High School, Tacloban City kag ginatudlo motibo nga biktima sang bullying ang mga suspek.
Sa interview sang Bombo Radyo Bacolod kay Police Col. Eugene Rebadomia, humalin sang pagbukas sang klase padayon ang police visibility nga makita lang sa gwa sang eskwelahan bangud indi man sila puede makasulod.
Suno kay Rebadomia, nag-instruct na ini sa tanan nga station commanders nga reviewhon ang contingency plan sa pagresponde ingkaso may matabo nga insidente.
Suno diri, nga makig-angot ang mga ini sa pamunuan sang mga eskwelahan agud nga mahibaluan ang security protocols nga ginapatuman sang mga ini sa sulod sang school premises.
Ini agud nga kun may yara sang makita nga kinahanglan i-improve makahatag sang suhestyon ang mga station commanders agud mapasanyog ang seguridad sa mga eskwelahan.
Panugyan ni Rebadomia nga untatan nalang ang pagsunlog bangud indi nanamian ang iban kag ini ang ginabatyag bilang pag-bully.
Nagpanawagan man ini sa mga biktima sang bullying nga magtawag lamang sa 911 ukon magpangayo sang bulig sa mga kapulisan nga malapit sa area agud marespondehan gilayon.
