Ginpasalig sang Bacolod City Police Office nga padayon ang ila pagmonitor sa body mass index sang mga police officers sa ciudad.
Ang istrikto nga pagmonitor sa BMI sang mga pulis ang ginsuguran ni anay PNP chief Archie Francisco Gamboa kag sang tinalikdan nga adlaw, ginpahayag ni PNP chief Police General Debold Sinas nga magapadayon ang istrikto nga pagmonitor sang BMI sang mga pulis matapos ang suspension sang tinalikdan nga binulan bangud sa COVID pandemic.
Suno kay Sinas, nakaistorya na ini sa PNP Directorate for Human Resource and Doctrine Development para sa pagresume sang BMI monitoring agud mabuligan ang obese nga mga pulis.
Sa interview sang Bombo Radyo kay BCPO spokesperson Police Lt. Col. Ariel Pico, nagresume naman ang Zumba sessions kada adlaw sang Martes kag Huwebes.
Sa mga personnel naman nga obese, Martes, Huwebes kag Sabado ang ila Zumba session kag extended sang isa ka oras ang ehersisyo paagi sa paglakat ukon pag-jog sa sulod sang BCPO headquarters.
Bangud sa COVID pandemic suno kay Pico, nagaobserbar lang ang mga pulis sang social distancing.
Sa pihak sini, gin-athag ni Pico nga wala ginapressure ang mga pulis nga magbuhin sang kabug-aton kundi ginapahanumdom nga disiplinahon ang kaugalingon sa pagkaon kag mag-inom sang bastante nga tubig.
