Pagatinguhaan sang Bacolod City Police Office (BCPO) nga mangin matawhay ang patigayunon nga opening salvo sang Grupo Progreso kag Grupo Asenso sa ciudad sang Bacolod sa Marso 26 kadungan sang pagbukas sang local campaign period sa Marso 25.
Suno kay BCPO Director Police Col. Thomas Joseph Martir, magapatigayon sang tagsa-tagsa ka mga opening salvo sa Marso 26 ang grupo nanday incumbent Mayor Evelio “Bing” Leonardia kag mayorial candidate Albee Benitez sa Paglaum Sports Complex kag Reclamation Area.
Sa karun wala pa nahibaluan kun diin ang mga ini magapatigayon sang aktibidad sa nasambit nga mga lugar apang sila ang magadungan.
Suno kay Martir, lunsay yara sa idalum sang jurisdiction sang Bacolod Police Station 1 ang mga lugar kag nagpasalig ini nga sila ang magadeploy sang supisyente nga numero sang mga personnel agud masiguro ang kalinong kag katawhay sang patigayunon nga rallies.
Kun kulang ang mga personnel sang Police Station 1, suno sa BCPO director, may yara pa man sang iban pa nga mga forces nga makadugang.
Suno diri, ila pagatinguhaan nga mangin malinong kag matawhay ang palaabuton nga opening salvo sa Sabado.
