Nagapatuman sang random checkpoint sa mga dalanon sa siyudad sang Bacolod agud nga masiguro ang pagsunod sa pagpatuman sang extended ECQ sa siyudad.
Suno kay P/Lt. Rondel Tapang, ang namuno sa random check point sa Lacson St., Mandalagan, sa atubang mismo sang Bombo Radyo Bacolod Station, masami na ang mga ini nagapatigayon sang random checkpoint magluwas sa border check-up points.
Nahibaluan nga liwat naman nga nagdamu ang mga nagbyahe nga pribado nga salakyan kahapon, apisar nga maulanon ang tiempo.
Ginatsekyar sang mga katapo sang kapulisan ang mga quarantine pass sang mga pumuluyo nga byahero agud nga matumod kun nagasunod ini sa nagakaigo nga odd-even number coding scheme sang siyudad.
May yara naman sang nadakpan nga mga wala makasunod sa number coding scheme kag gilayon man ini nga ginhold.
Kaupod sa napahanugutan ang gikan sa Talisay nga nagsulod sa Bacolod agud magpadialysis sang pasyente.
Samtang, gin-athag ni Bacolod City Vice Mayor El Cid Familiaran nga bangud sa bank transactions ang rason kun ngaa madamo sang salakyan sa ciudad kada adlaw sang Biyernes kag Lunes.
Sa interview sang Bombo Radyo Bacolod kay Familiaran nga chairman sang inter-agency task force against coronavirus, ginpahayag sini nga kalabanan sa mga negosyante ang nagatransaksyon sa bangko kada Biyernes kag Lunes.
Dugang pa sini, nagadagsa ang mga pumuluyo sa Bacolod bangud diri nahamtang ang mga main office sang mga bangko.
Suno sa bise alkalde, wala nagapabaya ang kapulisan sa pagbantay sa border check-up points.
Suno sa iya, tuman sa gihapon ka istrikto ang mga pulis sa pagpasulod sang mga tawo sa ciudad.
Apang kalabanan sa mga nagapadulong sa Bacolod amo ang mga essential workers kag mga negosyante nga naga-transaksyon sa bangko.
May yara man sang nagapadulong sa doktor, pawnshops kag iban pa nga mga essential businesses nga exempted sa enhanced community quarantine.
Ginpaathag man sini nga sa Bacolod pa lang, may yara na sang 150 mil ka mga residente nga nahatagan sang home quarantine pass.
Suno kay Familiaran, kun naka-number coding scheme, katunga sang 150 mil ang sarang makagwa sa ila nga mga panimalay dugangan pa sang mga essential workers sa ciudad kag iban pa nga mga frontliners nagikan sa probinsya.
Gani, normal lamang suno sa iya nga madamo sang salakyan sa dalanon.
