Ginakonsiderar sang Bacolod City Police Office ang pagtukod sang Special Investigation Task Group agud mapasanyog ang imbestigasyon sa pagpatay kanday Arian Mark Salaver nga ginpatay sa Purok Cabacawan, Barangay Villamonte; kag Julius Dumip-ig nga gin-abduct sa Barangay 13 kag ginsalvage sa banwa sang EB Magalona.
Suno kay BCPO director Police Col. Thomas Joseph Martir, nagapati ini nga indi konektado ang pagpatay sa miyembro sang Aki Cuadra Robbery Group nga si Salaver kag kay Dumip-ig nga gintiro sa Purok Boulevard, Barangay 13 antes ginsalvage.
Suno kay Martir, ginalantaw sang kapulisan nga mahimo pagtimalos ang motibo ukon may yara sang mga vigilante nga mga grupo nga nagalaot kay Salaver nga mahimo may kaangtanan sa ginabuhat nga mga aktibidades sang biktima.
Santo sa imbestigasyon sang Police Station 4 sa pagpanguna sang station commander nga si Pmaj. Ritchie Gohee, suspetsado si Salaver sa pagpatay sa isa ka Barangay Tanod sang Barangay 2 sa 12th St. Lacson sang tinalikdan nga tuig kag sa pagtiro sa isa ka persona sa Prk. Kagaykay, Brgy. 2, syudad sang Bacolod.
Plano sang BCPO suno kay Martir nga magtukod sang SITG agud tsekyaron ang mga areas nga sarang makuhaan sang CCTV footage agud mapadalman kag matutukan ang sunod-sunod nga mga pinatyanay nga nagluntad sa syudad.
Suno kay Martir, indi makonsiderar nga isolated case ang natabo bangud madamo naman nga kapareho sini nga insidente ang nagluntad.
Nagpanawagan man ang BCPO director sa mga witnesses nga posible makasaysay sang natabo ukon nakakilala sang mga suspetsado nga makipag-angot sa kapulisan agud makabulig nga masolbar ang kaso.
Ginpasiguro man ni Martir nga himuon sang kapulisan ang tanan nga masarangan agud mahatagan sang atensyon ang insidente kag malikawan na ang pareho sini nga mga hitabo.
