Naghatag sang pahanumdom ang City Director sa Bacolod City Police Office sa tanan nga police personnel sa nagakadapat nga pagresponder sa mga complaints.
Ini kasunod sang temporaryo nga pagkarelieve kay Police Captain Francis Depasucat, station commander sang Bacolod Police Station 1 kag duha ka police personnel.
Sa interview sang Bombo Radyo Bacolod kay BCPO Director Police Col Joeresty Coronica, ang duha ka pulis nga narelieve kaupod kay Depasucat ang may ranggo nga Police Executive Master Sergeant kag isa nga Patrolman.
Ang desisyon ang gindagdag matapos nga may isa ka persona nga nanawag sa Bacolod Police Station 1 bangod may-ara sang nagakastigo sa iya bahin sang Rosario-Locsin Street nga sakop sa area of jurisdiction sang estasyon.
Ini ang madasig man nga ginrespondehan sang duha ka pulis, apang pagdangat sa lugar gina-alegar nga apisar nga padayun nga ginakastigo ang biktima, wala sang may ginhimo ang mga pulis.
May alegasyon man nga nagahupot sang armas-luthang ang lalaki nga nagapangastigo.
Gin-athag sini nga ginrelieve si Depasucat agud indi maka-impluwensya sa imbestigasyon.
Samtang ang duha ka pulis ang ginrelieve naman bangod sa lapses sa pagresponder.
Gin-estorya man sini mismo ang duha ka personnel kag aminado si Coronica nga nakukangan ini sa ila eksplinasyon.
Suno diri, kun matuod ang alegasyon, dapat gin-aresto gilayon sang mga pulis ang nagapangastigo.
Ang magapanguna sa imbestigasyon amo ang City Investigation and Detective Management Unit (CIDMU) sa pagpanguna ni Police Major Junji Liba.
Panawagan ni Coronica sa mga personnel nga kun magresponder sa mga komosyon, dapat macontrol sang kapulisan ang sitwasyon.
Pahanumdom sini nga indi magkahadlok kag magduha duha bisan pa ma-impluwensya ukon kilala nga dalagko nga persona ang suspect.
