May patigayunon pa nga meeting sa pag-finalize sa security measures sa duha ka adlaw nga event sa installation sang bag-o nga obispo sa Diocese of Bacolod sa Agosto 10 kag 11.
Sa interview sang Bombo Radyo Bacolod kay Police Lt Col Lester Leada, Deputy City Director for Administration sang Bacolod City Police Office, ginalauman ang posibilidad nga magadangat sa masobra 700 ka mga maga-abot nga bisita gikan sa nagkalainlain nga mga lugar agud magtambong sa pag-install kay Most Rev. Louie Galbines bilang bag-o nga obispo sa Diocese of Bacolod bulos kay Most Rev. Patricio Buzon, D.D., nga magaretiro na.
Magapatigayon sang motorcade gikan sa banwa sang Hinigaran padulong sa Bacolod City sumugod ala-1:00 sang hapon sa Lunes.
Suno diri ang BCPO ang magapatigayon sang security assistance sa mga labayan nga routa, kag sila ang magakoordinar man sa Negros Occidental Police Provincial Office (NOCPPO) kag sa Philippine Army.
Ginalauman man nila ang mga VIPs kaangay ni Apostolic Nuncio to the Philippines, Archbishop Charles John Brown, mga obispo gikan sa nagkalainlain nga Dioceses, mga national government officials, politiko, kag mga negosyante nga luyag magsaksi sa dako nga okasyon.
Pag-abot sang parada sa Bacolod, panaugon sang mga salakyan ang ila mga pasahero pagdangat sa Luzuriaga Street, kag ang mga ini ang magalakat na lamang ukon maga-prosisyon padulong sa San Sebastian Cathedral.
Ang mga salakyan ang magapadulong sa Lupit Church nga gintalana nga parking area.
Ginapahanumdom na ngadaan ni Leada sa mga magabyahe nga lauman na ang mabug-at nga trapiko sa Araneta Street sa paglabay sang motorcade kag prosisyon, apang pasalig sini nga ini ang makadali lamang.
Apang kun may-ara gid sang ginahingagaw, mas maayo man nga magpangita na lamang sang alternatibo nga routa.
