Mas pasanyugon pa sang Bacolod City Police Office ang pagtutok sa pagpahina sa supply sang illegal nga druga sa ciudad sang Bacolod.
Sa interview sang Bombo Radyo Bacolod kay Police Lt Col. Antonio Benitez, pinuno sang Bacolod City Drug Enforcement Unit, indi lamang ang CDEU ang naga-operate batok sa illegal nga druga apang yara man ang accomplishments sang Philippine Drug Enforcement Agency (PDEA), Bacolod Police Stations kag iban pa nga ahensya.
Suno kay Benitez, nagadangat sa masobra milyones nga balor sang illegal nga druga ang nagakarekober sa mga drug operations.
Humalin sang Oktubre 14 tubtob Oktubre 20, 12 ang naaresto nga mga drug personalities sa siyam ka operations kag nakumpiskar ang 1,020.3 grams sang illegal nga druga nga may standard drug price nga P 13,821,240.
Suno kay Benitez, sa karun nga nagahilapit na ang highlights sang Masskara Festival 2024, mas nagasaka ang demand.
Pahayag sini, mas focusan sa karun sang mga kapulisan ang pagpahina sa supply sang illegal nga druga sa ciudad.
