Wala sang nakita nga rason ang tagpamaba sang Bacolod City Police Office (BCPO) agud kasuhan sang murder ang mga Covid positive patients santo sa ginrekomendar ni Chief presidential adviser Salvador Panelo kay Presidente Rodrigo Duterte, nga kasuhan sang murder ang mga COVID positive patients nga nagpanginwala nga COVID-19 positive ini kag may nalatnan kag napatay.
Sa interview sang Bombo Radyo Bacolod kay Police Major Sherlock Gabana, ginpahayag sini nga indi man ini mahulog sa murder ang kaso nga ipasaka batok sa COVID-19 positive nga nakalaton sa isa ka pasyente kag napatay bangud wala man ini sang intensyon nga patyun ang biktima.
Suno kay Gabana, sarang nga mangatubang ang pasyente sang paglapas sa RA 11332 Mandatory Reporting of Notifiable Diseases and Health Events of Public Health Concern Act ukon reckless imprudence resulting to homicide kun ingkaso may napatay gid man.
Ginpahayag man sang tagpamaba nga antes paman nga magpasaka sang kaso dapat ginpaidalom ini sa nagakaigo nga imbestigasyon.
Suno pa diri, dapat man nga mahatagan sang konsiderasyon ang mga nagpositibo sa balatian bangud biktima man sila sang circumstansya.
Nagpanugyan man si Gabana nga ang ginahimo sang mga otoridad ang indi pagpabudlay sa mga pumuluyo kundi pagbulig sa ila agud indi man maapektuhan ang ila pamilya kasubong man ang ila mga abyan.
Nagpanawagan man ini sang kooperasyon sang tanan sa ginapatuman nga health protocols.
