Ginpasalamatan nanday Bacolod City Mayor Evelio “Bing” Leonardia kag Vice Mayor El Cid Familiaran kag ang Emergency Operations Center officials ang mga tag-iya sang resort kag kapehan sa Barangay Punta Taytay kag Pahanocoy sa pagpasugot nga magpanirado sa Hunyo 24.
Santo sa ginpagwa nga pahayag sang alkalde, dako ini nga bulig agud nga matapna ang paglapta sang virus bangud indi masarangan sang syudad ang pagdinaguso sang linibo nga mga tawo sa mga baybay sa syudad sa adlaw sang kapiyestahan sang San Juan.
Luyag man nila pasalamatan ang partisipasyon kag pagsuporta ni Punong Barangay Leah Palma sang Punta Taytay kag Punong Barangay Yolanda “Bebeng” Noble sang Pahanocoy, nga lunsay nagpahayag sang bug-os nga pagsuporta sa proposal nga pagsirado sang mga baybay sa ila mga lugar sa nasambit nga adlaw.
Subong nga adlaw, makighinun-anon ang syudad kaupod sang mga tag-iya sang tourism-oriented establishments sa Barangay Alangilan kag Granada agud mag-apelar man sang pareho nga pagsuporta kag kooperasyon.
Nagalaom man ang alkalde, nga makakuha sila sang pareho nga positibo nga sabat nagikan sa nasambit nga mga barangay.
Ginpahayag man sang alkalde, nga sa tion nga nagapadayon ang pagtaas sang kaso sang COVID-19 sa syudad kinahanglanon ang kooperasyon sang tanan.
Naga-apelar man sila sa general public nga likawan ang pagpadulong sa mga baybay kag resorts sa palaabuton nga adlaw sang kapiyestahan ni San Juan.
