BACOLOD CITY-Patay ang 76-anyos nga Belgian national matapos gintiro sang mga kawatan nga nagsulod sa ila balay sa Villa Angela Subdivision, Barangay Villamonte, Bacolod City alas 1:50 kaina sang kaagahon.
Sa interview sang Bombo Radyo sa driver sang pamilya nga si Guillermo Perez, ginpahayag sini nga kaupod sang biktima nga si Carl Nolens sa balay ang asawa sini nga si Lisa Marie Bantigue-Nolens, utod ni Lisa nga si Nonoy kag ila nga timbang.
Suno kay Perez, armado sang long firearms ang apat ka mga suspetsado kag gingapos sang mga ini si Nonoy kag ang timbang sa first floor sang balay.
Sang nabatyagan ni Carl nga may mga kawatan, nagpasalba ini sang lupok apang siya ang gintiro sang mga suspetsado sa tiyan sang makatatlo ka beses nga gintunaan sang iya kamatayon.
Nabalian naman ang misis matapos maglukso nagikan sa 2nd floor sang balay agud nga makasalbar.
Suno sa driver, nagpauli ini sa Himamaylan kag ginpahibalo lang sang hinablos ni Lisa sang insidente gani gilayon ini nga nagkadto sa balay apang ginhulat pa sini ang mga pulis antes magsulod.
Gindala man ang asawa sini sa ospital bangud indi ini makabangon tuga sang kataason sang iya ginlumpatan.
Suno kay Perez, si Nolens ang isa ka dentist sa Belgium samtang naganegosyo naman sang rent-a-car si Lisa.
Nahibaluan nga lain kuntani nga balay ang tuyo nga kawatan sang mga suspetsado apang bangud may ido kag indi sila makasulod, nagsaylo sila sa balay ni Nolens.
Indi naman ini ang una nga beses nga may nagtuyo nga magpangawat sa nasambit nga balay.
