Ginabanta nga indi magnubo sa P30 milyones ang pondo nga kinahanglan sang management sang Central Negros Electric Cooperative agud nga mahatag ang benepisyo sang mga empleyado santo sa kaundan sang Collective Bargaining Agreement sang unyon.
Suno sa miyembro sang Board of Directors sang CENECO nga si Fr. Ernie Larida, nakaintindi ang management sang ginapangayo sang mga empleyado apang nagalaom ang mga ini nga maintindihan sang unyon ang sitwasyon sa karon nga may COVID pandemic kag may naglabay pa nga bagyo.
Suno kay Larida, indi mautdan gilayon sang supply sang kuryente ang mga establisyimento nga indi makabayad bangud sa COVID pandemic gani apektado ang income sang CENECO.
Santo sa gintalana sang National Electrification Administration, dapat nga malab-ot sang CENECO ang 95 percent collection efficiency agud nga mahatag ang kaundan sang CBA.
Apang sa karon, 92 porsyento lang ang collection efficiency sang CENECO.
Suno kay Larida, ang mga miyembro man sang CURE ang nagakolekta sang income sang power distributor gani kinahanglan ang kooperasyon kag pag-intindihanay bangud bilang isa ka public utility, apektado ang mga konsumidor kun mag-untat ang mga empleyado sa pagtrabaho.
Suno sa BOD member, ang kasugtanan nga ginpirmahan sang Nobyembre 29 ang commitment na sang CENECO nga tumanon ang provision sang CBA kun malab-ot ang requirement sa collection efficiency apang indi matumod ang petsa bangud indi man mapaktan kun san-o makakolekta sang 95 percent sang balayran sang mga member-consumers.
