Nagpanugyan si Bacolod City Mayor Alfredo Benitez sa mga negosyante nga nagaproseso sang business permit sa city government nga gamiton ang QR code nga yara sa ila dokyumento agud matrack kun sa diin na ini nga opisina kag indi mabiktima sang mga fixer nga nagapameke.
Sa State of the City Address ni Mayor Alfredo Benitez Miyerkules sang hapon, ginpahayag sini nga ginapatuman sa karon ang online tracking system.
Sa idalom sini, ang documents nga nabaton sang ciudad ang tatakan sang QR code kag kun ini ang iscan, mahibaluan kun sa diin ini nga opisina ginrefer kag kun ano na ang status.
Sang tinalikdan, malawig ang pagproseso agud nga makakuha sang business permit gani nagapalapit ang iban sa mga fixer agud indi na mabudlayan.// Apang lipod sa ila ihibalo, peke ang dokyumento nga ginhatag sa ila.
Suno kay Benitez, ginsuguran na sang Office of the City Mayor ang paggamit sang QR code sa business permit kag iban nga dokyumento agud nga matrace kun sa diin na nga opisina ang papeles.
Suno sa Business Permits and Licensing Office, nakabaton sila gihapon sang report nga may nagapameke sang business permit.
Suno diri, mahapos lang tumuron sang BPLO kun peke ang business permit bangud may QR code sa tanan nga business permit nga ginaissue sa karon.
Bangud sini, nagpanugyan ang local chief executive sa mga negosyante nga iscan ang QR code sa business permit agud nga matumod kun ini ang peke ukon authentic kag isugid gilayon kun nakit-an nga ini ang peke.
Nagpanugyan man ini nga indi na maglabay sa mga fixer bangud ginatinguhaan sang city government nga mapahapos ang transaction.
