Proud ang ginakabig nga “best nanay” sa 2025 Western Visayas Regional Athletics Association Meet (WVRAA 2025) sa runner sini nga bata.
Madasig nga nakaagaw sang atensyon sang netizen ang post natuhoy kay Rayray Cordova nga mas kilala nga Mama Rayray sang Brgy Tabugon, Dingle, Iloilo bangod sa pagsinggitan sini kag pagdalagan kadungan sa paghampang sang iya bata nga si Mariah Laudine Cordova.
Isa sa nagtatak sini nga singgitan ang “Lagas Mariah!!!”
Sa interview sang Bombo Radyo Bacolod kay Mama Rayray, si Mariah ang nagcompete sa 100 meter hurdles kag 400 meter hurdles kun sa diin siya ang nakakuha sang silver; kasubong man sa 400 meter run kag 4X400 meter relay kun sa diin siya ang nakakuha sang bronze.
Suno kay Mama Rayray, nag-intra sa dalagan ang iya bata sang preschool kag sang makadaog, ini ang iya na nga nakahuyugan.
Bilang iloy, suportado man sini ang huyog sang iya bata.
Pahayag ni Mama Rayray nga yara pa lamang sa starting line, nagasinggitan na ini sang “Mariah Biyae!!!” kag nagayuhom lamang ang iya nga bata.
Kadungan sang paglupok nga senyales sang pag-umpisa sang dalagan, siya ang nagakakibot kag bangod ini ang daranon siya ang nagadalagan man sa gwa sang field sunod sa pagdalagan sang iya bata.
Wala naman ini nakahibalo nga may-ara sang nagavideo sa iya tubtob nga ginhambalan na lamang ini nga may luyag mag-interview sa iya.
Ginapasalamatan man sini ang mga manunudlo kag coach nga nagtudlo sang disiplina sa kay Mariah.
