Naka-Red Alert Status na ang Bureau of Fire Protection Bacolod sa pagbantay sa tanan nga deployment area sa ciudad sang Bacolod subong nga Tigkalalag.
Sa interview sang Bombo Radyo kay Fsupt. Jenny Mae Masip, City Fire Marshal sang Bacolod City Fire Station, nagdeploy na sila sang 129 ka mga personnel agud magbantay sa mga pantalan, terminals kag sa mga sementeryo subong nga Tigkalalag.
Suno kay Masip, halin pa sang Oktubre 28, nagsugod na sila deploy sang 50 ka mga peronnel sa idalom sang Blue Alert Status.
Suno diri, apat tubtob lima ka mga BFP personnel ang gindeploy sa tagsa ka mga sementeryo sa ciudad.
Samtang, lima tubtob anum ka mga peronnnel ang ginadeploy sa mga dalagko nga areas kaangay sang public cemetery.
Suno kay Masip, may mga naka-standby man nga Emergency Medical Services (EMS) para sa mga blood pressure monitoring kag may ginapanghatag man nga freee drinking water sa mga biyahero.
Dugang pa, napulo ka mga firetrucks ang nakastandby sa pila ka mga sementeryo kag may mga fire extinguisher man agud gilayon nga marespondehan inkaso may sunog.
Pahanumdom ni Masip sa mga magaduaw sa ila pinalngga nga minatay sa sementeryo nga mangin vigilante antes magbiya sa balay.
Sigurohon nga na-unplug ang tanan nga electric appliances kag napalong ang tanan nga nakasindi nga kandila ukon kingki kag LPG agud malikawan ang sunog.
