Ginpasalig sang Bureau of Fire Protection (BFP) – Bacolod nga hugot nga ginapatuman ang Republic Act 9154 ukon ‘Fire Code of the Philippines’ antes makahatag sang Business Permit sa ciudad sang Bacolod.
Ini kasunod sang nagluntad nga sunog sa Binondo, Manila kun sa diin 11 ang nagkalamatay.
Sa interview sang Bombo Radyo Bacolod kay Fire Supt. Jenny Mae Masip, fire marshal sang Bacolod City Fire Station, sa renewal ukon application sang bag-o nga business permit, ang BFP ang nagapatigayon gid sang fire safety inspection.
Magluwas sa mga negosyo, kalakip sa estrikto nga ginapatigayunan sini ang mga boarding houses kag dormitories.
Ini agud maseguro nga nagakasunod ang guidelines sang Fire Code.
Paathag ni Masip nga duha ka sahi ang gina-issue nga fire safety inspection certificate, nga ginalakipan sang para sa occupancy permit kag ang isa ang para sa business permit.
Suno diri sa pag-apply sang building permit, gina-endorso sang Office of the Building Official sa BFP ang request kag ini ang ginatsekyar sang ila plan investigator.
Ginalantaw kun may nagakaigo nga fire exit kasubong man fire suppression system kun nasulod sa pila ka mga criteria.
Sa masami ang may nagakinahanglan sang fire suppression system amo ang mga buildings nga 4-storey pasaka, apang may tion man nga ini ang ginarequire sa duha tubtob tatlo ka panalgan kun nagadangat sa 15 pasaka ang kadamuon sang mga kwarto.
Suno diri, dapat may-ara sang fire detection alarm system nga magadetect sang aso kag kun mala-ot na ang heat limit, automatic naman nga magabuga sang tubig ang sprinklers.
Panindugan sini nga ang water springkler ang nakadisenyo nga may ikasarang sa pagtapna sang gamay nga kalayo.
Pahanumdom sini nga kun wala nakasunod sa requirements, ang mga establishimento ang mangatubang sang administrative kag criminal sanctions.
