Preparado na ang Bacolod City Fire Station para sa Masskara Festival 2025.
Sa interview sang Bombo Radyo Bacolod kay Bacolod City Fire Marshal Fire Superitendent Jenny Mae Masip, may deployment sang fire personnel sa festival site kaupod ang fire truck kag mga ambulansya.
Suno kay Masip ang mga fire personnel ang ibutang man sa mga strategic areas bangud sa ginalauman nga pagdugok sang festival goers.
Magluwas sa deployment sang mga fire personnel magapatigayon man ang katapo sang Bacolod City Fire Station sang fire safety inspection sa mga stalls.
Ang Bacolod Gugma Foundation naman ang nagplastar kag nagkuha sang tanan nga mga requirements nga kinahanglanon sa pagplastar sang stalls.
Tsekyaron lamang sang mga ini kun standard ang stall kag kun may deperensya maga-issue sila sang notice to comply, kag kun indi pa gid makacomply may posibilidad nga kuhaon ang gin-issue nga permit.
May yara man sang ginpreparar nga fire extinguisher ang Bacolod City Fire Station agud nga may gamiton kun kinahanglan.
Wala naman nagkuha sang augmentation ang Bacolod City Fire Station gikan sa iban nga banwa kag ciudad para sa Masskara Festival bangud may nagakaigo man sila nga personnel.
Sa tion nga may sunog malapit sa fire substation nga nakadeploy sa Masskara Festival, ang iban nga standby fire substation amo ang magaresponde.
