Gin-aprubahan sa Sangguniang Panlungsod kahapon ang ammended resolution nga gin-author ni Councilor Wilson Gamboa Jr. tuhoy sa pagfurnish sang kopya sang incident report sang Bureau of Fire Protection (BFP)-Bacolod sa nagluntad nga sunog sa SAO office ukon administrative section sang City Mayor’s Office sa Bacolod Government Center sang Oktubre 14.
Madumduman nga ginabanta 15 mil pesos ang nangin kahalitan sang nasambit nga sunog tinalikdan nga semana.
Takna alas-6:24 sang aga sang may nagpanawag sa BFP nagikan sa BGC nga may nagapanimaho nga daw sunog nga kuryente.
Gilayon naman nga nagresponde ang duha ka unit sang Bureau of Fire Protection (BFP) agud tsekyaron ang lugar tubtob nga ila natukiban nga nagakasunog na ang admin section sang City Mayor’s Office nga nahamtang sa 3rd floor sang BGC.
Maswerte na lamang suno kay Bacolod City Fire Marshal Fire Chief Insp. Publio “buboy” Ploteña bangud nga diutay nalang nga kalayo ang bilin bangud nga nag-andar ang sprinkler.
Sa deliberasyon sang SP kahapon, gin-aprubahan ang resolution ni Gamboa nga magrequest sa BFP nga magfurnish sang kopya sang ila imbestigasyon ukon incident report agud nga mahibaluan kun ano gid man ang matuod-tuod nga natabo.
Suno kay Gamboa, tinutuyo sang nasambit nga resolusyon ang maverify ang mga impormasyon nga nagagwa sa media kag social media kag indi ini subject sa prejudice.
