BACOLOD CITY — Magapatigayon ang Bureau of Fire Protection sang fire drill sa mga lugar nga masami ukon madali luntaran sang sunog sa ciudad sang Bacolod.
Sa interview sang Bombo Radyo, ginpahayag ni Bacolod City Fire Marshal Fire Chief Inspector Publio Ploteña nga patigayunon ang fire drill sa mga populated areas kaangay sang squatters area.
Suno kay Ploteña, wala sang narekord nga insidente sang sunog kadungan sang pagsug-alaw sang Bag-ong Tuig apang sa una pa lang nga inadlaw sang subong nga bulan, duha na ka sunog ang nagluntad.
Una diri ang narekord sa Barangay Banago samtang sa Purok Magsungay, Barangay Singcang Airport naman ang ikaduha nga insidente nga nagluntad kagab-i.
Suno sa fire marshal, naghingyo kuntani sila sa higher headquarters nga butangan sang fire hydrant ang squatters area apang wala gindayon bangud kawaton man lang sang mga pumuluyo.
Bangud sini, nadesisyunan nga hanason nalang ang mga residente sa pag-away sa kalayo.
