May yara na sang person of interest ang Bureau of Fire Protection may kaangtanan sa suspetsado ukon mga suspetsado nga nagsunog sa Java Pension House sa corner Gonzaga-Locsin Streets, ciudad sang Bacolod, Martes sang kaagahon kun sa diin ginapahayag nga sa ground floor nagsugod ang kalayo.
Ini matapos nga makuhaan sang video ang mga suspetsado nga ginaalegar naghaboy sang ginsindihan nga helmet sa mga motorsiklo nga nakapark sa ground floor sang pension house.
Sa interview sang Bombo Radyo kay Fire Chief Inspector Publio Ploteña, fire marshal sang Bacolod, wala ginadula ang posibilidad nga arson ang nasambit nga insidente.
Sa karon, may nakuha na sila nga mga videos, footage sang mga CCTV camera sa palibot sang establisyimento kag mga saksi nga nakakita sa mga suspetsado.
Suno sa fire official, wala sang sprinkler ang pension house apang ila pa gid nga usisaon ang bilog nga sprinkler system sini kun wala nagagana.
Pagatumuron pa man kun ano ang dugang nga bayolasyon sang management apang aminado si Ploteña nga wala sang mapasabat diri bangud napatay ang tag-iya nga si Christopher Java.
Samtang, indi man matumod sang BFP kun pila gid ang kabug-usan nga numero sang mga guest nga yara sa pension house sang natabo ang sunog bangud nasunog ang guestbook kag wala naman nagbalik ang mga nakacheck-in pagkatapos sang sunog.
