Padayun ang paglibot sang Bureau of Fire Protection Negros Occidental sa mga eskwelahan nga pagahimuon sang Commission on Elections (Comelec) bilang polling center.
Suno kay Fire Supt Kim Celisio, acting provincial fire director sang BFP-Negros Occidental, dako ang responsibilidad sang BFP, sa patigayunon nga piniliay.
Sa karun, ginatipon pa ang kabug-usan nga datos apang pasalig ni Celisio nga wala sila sang nakita nga dako nga problema sa ila nga mga nangin inspection.
Nagpahanumdom naman ini sa mga personnel nga ma-assign sa sulod sang mga polling centers nga maghalong kag likawan ang octopus connection ilabi na nga may mga pagagamitun nga makinaryas kaangay sang Vote Counting Machine (VCM) kasubong man ang mga Electric Fan.
Ini agud nga malikawan ang short circuit ukon pag-overload sang kuryente.
Pahanumdom naman ni Celisio nga magbutang sang mga emergency number sa kada polling places kaangay sang hotline sang BFP agud nga may matawagan gilayon ang mga pumuluyo inkaso nga may magluntad nga aksidente.
