Ginpaidalom na sa red alert status ang Bacolod City Fire Station kadungan sang pag-implementar sang Oplan Kaluluwa.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, Oktubre 27 pa lamang sila ang yara na sa heightened alert kag Oktobre 30 tubtob Nobyembre 2 sila ang yara na sa Red Alert.
Bangod sini, tanan nga personnel ang ginrecall magluwas lamang sa mga nakasick leave nga may medical certificate.
Sila ang may deployment naman kalakip ang mga bombero, firetrucks, nurses kag ambulance sa mga sementeryo, pampubliko man ukon pribado kag sa mga terminals kag pantalanan nga ginalauman nga dagsaon ang pasahero.
Magluwas sa pagbantay, ang BFP ang nagapanghatag man sang flyers nga ginalakipan sang mga pahanumdom agud malikawan ang sunog.
Suno kay Masip, nakaligad nga UNDAS 2024, may duha ka sunog nga nagluntad sa Bacolod City, nga ginalakipan sang isa ka electrical in nature kag isa nga tuga sang kandila sa altar.
Panawagan sang City Fire Marshal nga kun wala sang makabantay, maayo nga kuhaon na lamang ang kandila sa altar ilabi na nga masami ginabistihan ang Santos kag may-ara sang kurtina nga sarang malab-ot sang kalayo.
Bangod madamo sang ginalauman nga magabiya sa balay agud magbisita sa minatay, panawagan man sini nga seguraduhon nga na-unplug ang mga electrical appliances, kag kun mahimo mas maayo nga patyon nalang gid ang breaker.
Paathag ni Masip nga kun may ara sang loose connection ukon open wire, ini ang mahimo dakpon sang kuryente kasunod sang power surge sa pagbalik sang power supply kasunod sang brownout nga mahimo makatuga sang sunog.
