Ginkumpirmar sang Bureau of Fire Protection nga apat ka mga kabataan ang yara na sulod sang balay sang magluntad ang sunog nga gintunaan sang kamatayon sang isa ka tuig nga bata nga babayi sa Purok Paglaum, Brgy. Paraiso, ciudad sang Sagay, Negros Occidental kahapon.
Sa interview sang Bombo Radyo kay Senior Fire Officer Rodney Nadal sang Sagay Bureau of Fire Protection, ginapahayag sini nga sa ila initial nga imbestigasyon, nagakatulog ang apat ka mga kabataan kag yara naman sa gwa ang iloy sang mga ini nga ginkilala kay Jenny Rose Limpaque sang magluntad ang sunog.
Suno kay Nadal, nwebe anyos, lima ka tuig, duha ka tuig kag isa ka tuig ang mga kabataan.
Suno sa iya, masami nga nagagwa si Limpaque kun gab-i agud nga magcharge sang iya nga cellphone bangud wala sila sang kuryente.
Nagausar lang ang mga ini sang kingki agud may suga kun gab-i.
Suno sa nwebe anyos, nagakatulog na sila sang makabatyag ini sang init gani gilayon sini nga ginpukaw ang lima ka tuig kag duha ka tuig sini nga mga manghod apang bangud sa madasig nga paglaptsa sang kalayo, wala na nila mahingagaw ang ila nga manghod.
Suno sa hepe, burned down ang balay sa pag-abot sang iloy.
