Makitid nga dalan ang isa sa kabudlayan nga naeksperyensyahan sang mga bumbero sa pagpalong sang nagluntad nga sunog sa Greenville Bato, Barangay Rizal, San Carlos City, Negros Occidental sang Lunes, Setyembre 22.
Sa interview sang Bombo Radyo Bacolod kay San Carlos City Fire Marshal Fire Chief Inspector Erwin Johannes Gimotea, nagdangat sa 93 ka mga balay ang nasunog kag 87 diri ang totally-burned samtang anum naman ang partially burned.
Nagdangat sa P2,613,450 ang balor sang halit sa 7,467 square meters nga area nga nasunog.
Samtang, electrical in nature naman ang ginalantaw nga ginhalinan sang kalayo.
Suno kay Gimotea, may-ara sang electrical ignition bangod sa overloading halin sa octopus’ connection partikular na sa 6-gang connection cord nga naka-attach sa 3-gang extension cord.
Sa karun may yara sang 34 ka pamilya nga nagatinir sa Barangay Rizal Covered Court nga nahatagan na sang Modular Tents kag relief assistance halin sa City Social Welfare and Development Office.
Samtang may 31 naman ka pamilya nga nagatinir sa Quarantine Facility sa Brgy. 2 nga nahatagan na sang relief assistance sang Local Goverment Unit.
Suno kay Gimotea, indi pa maverify kun informal settlers ang tanan nga naga-istar sa lugar bangud ang duta ang ginapanag-iyahan sang pribado nga indibidwal.
Madasig man nga nagdako ang kalayo bangud sa hangid nga dala sang Hangin Habagat.
Nahibaluan nga ang sunog ang ginpasaka sa 2nd alarm kag nagresponde man ang Vallehermoso Municipal Fire Station.
