Wala sang may narekord nga sunog ang Bureau of Fire Protection (BFP) sa ciudad sang Bacolod kadungan sang pagsug-alaw sang bag-ong tuig.
Sa interview sang Bombo Radyo Bacolod kay Fire Chief Inspector Publio Ploteña, fire marshal sang Bacolod Fire Station, ginpahayag sini nga nangin generally-peaceful ang pagsug-alaw sang bag-ong tuig santo sa ila nga assessment.
Suno pa kay Ploteña, nalipay gid siya nga wala sang may nagluntad nga sunog kadungan sang holiday season.
Santo sa data, ini na ang ika-tatlo nga tuig nga wala sang may natabo nga fire incidents sa ciudad sa tion sang paskwa kag bag-ong tuig.
Nagapasalamat man ini nga nagkooperar gid ang publiko sa ila nga panawagan nga likawan ang palupok kag sakdagon na lamang ang community fireworks display.
