Magahatag sang bulig ang Barangay Granada sa ciudad sang Bacolod sa pamilya sang drayber sang tractora nga napatay matapos nga mapintalan sang manibela sang madagdag sa pil-as ang tractora sa Hda. Loygoy, Brgy Granada, Bacolod City, kahapon.
Sa interview sang Bombo Radyo Bacolod kay Punong Barangay Armando Vito, ginbuligan na sang mga ini ang asawa sang napatay nga si Mario Tandog nga mahimos kag madala sa punerarya ang biktima.
Wala naman masarangan sang responder sang barangay ang pagrescue sa biktima nga napintalan sang tractora.
Nagtawag man ini sang katapo sang Bureau of Fire Protection (BFP) agud nga mabuligan ang pagrescue.
Nagkihanglan pa sang backhoe agud nga makuha ang nahulog nga tractora sa pil-as nga nagataas sang napulo ka tapak.
Suno sa Punong Barangay mahimo nga ang pressure sang nagpintal sa biktima ang rason sang kamatayon sini.
Natalana ang mga ini nga magaestoryahanay sang Barangay Health Worker nga asawa sang biktima agud nga makahatag ang barangay sang bulig kun ano pa ang dugang nga mabulig.
Nagahimos pa kuntani nga magaduty sa barangay hall ang asawa sang biktima apang wala na nakadayon bangud sa natabo sa iya bana.
Madumduman nga nagasakay sa trailer sang tractora si Herwin Martinez kaupod si Reynato Sause kag ang drayber naman amo si Mario Tandog, 59 anyos.
Nagatalikod ang tractora agud nga kargahan sang compost sang hinali lang ini nga nagderetso sa pil-as.
Ginpahayag nga naka-break pa si Tandog apang dalayon ini nga madagdag sa masobra sa 10 feet nga pil-as.
Nakahingagaw nga maglumpat sanday Martinez kag si Sause nga nag-agom sang minor injuries apang napintalan si Tandog sang manibela sang nagkaya ang tractora samtang nag-agom sang pilas sa ulo kag dughan ang drayber rason sang kamatayon.
