Ginapakamaayo sang chairperson sang Bids and Awards Committee sang Silay City Government nga madayun na gid man ang pagtukod sang Silay City Capitol.
Sa interview sang Bombo Radyo Bacolod kay Atty Janus Jarder, natapos na sila sa bidding process kag ang winning bidder amo ang Silver and Dragon Construction sang negosyante nga si Jerry Sy.
Paathag sini nga tatlo ang contractor nga nagbid, apang sa pagsumiter pa lamang sang technical folders, wala na nakapasar ang duha.
Yara na sa karun sila sa post qualification kun sa diin ginacomply ang nagakaigo nga mga requirements sa winning bidder.
Aminado si Jarder nga nagdugay ang proseso bangod may-ara sang una nga nagcomplaint, apang ini ang iya naman nga ginpaathag sang maayo.
Apang aminado si Jarder nga kun ang isa ka persona ang indi gid luyag nga magpabor, bisan ano nga pagpaathag, ini ang magapamatok gihapon.
Sa pihak sini ang masunog gihapon amo ang majority votes.
Kasunod sini, ang Sangguniang Panlungsod ang magapasar naman sang resolusyon nga magahatag gahom kay Silay City Mayor Joedith Gallego para sa pagpirma sang civil work contract.
Paathag ni Jarder nga sunod nga maga-issue sang Notice to Proceed apang paathag sini nga indi man mapadayun ang proyekto nga wala mapatpat ang detailed engineering design.
Suno kay Jarder, ang Silay City Hall ang may budget nga P400 million gikan sa P1.1 billion loan sang ciudad.
Ang iban nga proyekto nga gamitan sang loan ang para sa Silay City College kag Silay Public Market./
