Ginpahayag sang Chairman sang Bids and Awards Committee sa syudad sang Bacolod nga ang IPM-Construction Development Corp gihapon amo ang nagdaog bilang opisyal nga hualing, collection kag management sang mga basura sa syudad, matapos nga wala ang mga ini sang kasumpong sa bidding process.
Suno kay Atty Maphilindo Polvora, ang IPM lang ang nagpartisipar sa bidding process.
Paathag sini nga magapabilin lang gihapon ang terms and condition sang kontrata kag parehas man gihapon ang balor nga nakasugtan sa bidding.
Ini ang ginalakipan sang masobra P15 million nga kontrata para sa hauling kag masobra P9 million sa management sang sanitary landfill ukon P24 million kada bulan.
Paathag ni Atty Polvora nga maga-umpisa ang kontrata sa Mayo kag matapos sa Desyembre subong nga tuig.
Suno sa abogado, ginpahayag sang IPM-Construction Development Corp. nga sa sanitary landfill na sa Barangay Felisa patigayunon ang segregation indi kaangay sa nakasaad sa layi nga dapat sa barangay-level palang ginapatigayon na ang segregation kag indi kuhaon sang garbage hauler ang mga basura nga wala nabahin-bahin.
Ginpasalig man sang abogado nga kwalipikado man ang IPM kag magapatigayon paman ang mga ini sang post-qualification.
Maga-inspeksyon man ang mga technical working group natuhoy sa numero sang hauler trucks ukon numero sang tawo kun ang mga ini ang nagasanto sa required sang terms and condition sang kontrata.
