Ginpahayag sang chairperson sang Bids and Awards Committee sang Silay City Government nga P1.1 billion ang loan sang ciudad sa Land Bank of the Philippines.
Sa interview sang Bombo Radyo Bacolod kay Atty. Janus Jarder, una nga nagpropose sang loan ang ciudad sa Development Bank of the Philippines (DBP) apang bangod nga madugay ang proseso kag releasing, mas ginpili na lamang nila nga mag-utang sa Land Bank of the Philippines.
Nasulod sa P1.1 billion nga loan ang pagpatukod sang bag-o nga city hall, Silay City College, kag ang pagrenovate sa Silay public market.
Suno diri, masami nga ang bangko mismo ang naga-offer nga magbulig sa financing kun may yara sang proyekto nga ginadihon ang gobyerno.
Gin-athag sini nga P1.1 billion ang approved nga loan sang ciudad kag indi P1.4 billion bangod nga ginkansela ang P300 million nga para kuntani sa pagpatukod sang sports complex.
Dugang pa ni Jarder, nakaligad pa gindonate ang duta nga patindogan sang bag-o nga city hall amo nga ginahingagaw nga masuguran ang construction.
Pahayag sini, ila igapasa ang tanan nga dokumento nga may yara sila nga ginapangayo sang kongreso bangod wala man sila sang may ginatago sa ila trabaho.
Ini kasunod sa ginpatigayon nga hearing sa House of Representatives kahapon kun sa diin gindiskusyunan ang loan sang ciudad sang Silay.
