Ginkumpirmar sang hepe sang Bacolod Police Station 7 nga isa ka bulan pa lang nga nakagwa nagikan sa prisuhan ang barbero nga ginluthang sang riding-in-tandem suspects sa Barangay Mansilingan, Bacolod City, Biyernes sang gab-i.
Madumduman nga nagluntad ang insidente sa Felisa-Handumanan Road sa tupad sang Our Lady of the Miraculous Medal Parish and Shrine kun sa diin ang biktima ang ginkilala kay Alyas Tinot Bantigue, 32 anyos, kag residente sang Purok Kabugwason, Barangay Mansilingan.
Suno sa amo nga babayi sang biktima, alas-6:45 sang gab-i sang magsirado ang ila negosyo, gilayon naman nga naglisensya ang biktima nga magapauli na ini.
Apang nag-ayo ang amo nga hulaton nalang ini agud dungan nalang sila magapadulong sa Purok Kabugwason.
Ginsugo sini si Bantigue nga magtawag sang masakyan nga tricycle, 10 pa lang ka minutos ang nakaligad, may nagpadulong sa iya nga nagpahibalo nga ini ang ginluthang.
May animo pa ang biktima sang gindala sang ambulansya sa ospital, apang ini ang nadulaan man sang kabuhi.
Sa interview sang Bombo Radyo kay Police Captain Elmer Bonilla, ginpahayag sini nga isa ka bala ang nagsulod sa agtang ni Bantugye.
Nakuha sa crime scene ang isa ka empty shell sang caliber .45.
Suno kay Bonilla, tuig 2019 sang nadakpan ini sa kaso may kaangtanan sa illegal nga druga kag siya ang ginakabig nga high value individual.
Suno sa iya, isa ka bulan pa lang nga nakagwa ang biktima sa prisuhan matapos naka-avail sang plea bargaining agreement kag sa karun under provision.
Suno diri, wala pa sila naka-establish sang motibo sa pagpatay diri kag ila pa ginatsekyar ang personal nga profile sini kag kun ano ang iya trabaho magluwas sa kaangtanan sini sa illegal nga druga.
