Nagpatigayon sang imbestigasyon ang Bacolod City Maritime Group sa natabo sa mananagat nga gintiro samtang nagapanagat sa tunga sang lawod.
Ginkilala ang biktima kay Reynaldo Manlangit, 52-anyos kag pumuluyo sang Barangay Kagaykay, Barangay 2, Bacolod City.
Sa interview sang Bombo Radyo kay Police Major Stephen Boniba, pinuno sang Bacolod City Maritime Group, nagkoordinar sila sa Iloilo Maritime Group kun sa diin may yara sang report nga natabo nga shoot-out sa isa ka nakapalagyo nga mananagat.
Suno diri, nagpadulong sa ospital diri sa ciudad sang Bacolod ang Iloilo Maritime Group kag nagpatigayon sang investigation, verification kag identification kay Manlangit kag gin-ako man sini nga siya ang ginatumod nga nakapalagyo nga mananagat.
Suno kay Boniba, samtang nagapatigayon sang seaborne patrol ang Iloilo Maritime Group nakit-an si Manlangit kag ang isa pa gid ka mananagat nga naglapaw na sa area kun sa diin lamang sila tubtob makapangisda.
Apang, antes pa man madala ang duha ka mananagat sa Dumangas, gin-utod ni Manlangit ang pisi kag nalagyo kag nagpalupok sang armas-luthang.
Ang isa ka mananagat nadala sa Dumangas kag nakuhaan sang armas-luthang samtang si Manlangit naman nakabalik sa ciudad sang Bacolod kag wala nakita sa iya ang armas-luthang nga iya gingamit suno sa Iloilo Maritime Group.
