Ginpahayag sang station commander sang Bacolod Police Station 4 nga antes nasapwan ang bangkay ni Levy Ortega sa National Highway sang Purok 1, Barangay Aguisan, syudad sang Himamaylan, ginpahayag sang bata sini nga may nagkuha sa ila amay kag ginsakay ini sa van tubtub ila nalang nabalitaan nga patay na ini.
Sa interview sang Bombo Radyo Bacolod kay Police Major Ritchie Gohee, si Ortega ang ginkuha sang armado nga mga tawo apang antes pa ginpwersa sulod sa van, may ginapangita nga items ang mga tawo.
Nagtawag man ang minor nga bata ni Ortega sa mga kapulisan agud magverify kun may yara sang buybust operation nga ginpatigayon sa ila lugar.
Ginsabat man ini sang desk officer sang Police Station 4 nga wala sang ginpatigayon nga buybust operation.
Indi man malagba ang armas nga gindala sang mga tawo nga nagsulod sa balay nanday Ortega.
Samtang wala man naintindihan sang mga kabataan sang biktima ang ginapangita nga items.
Wala man ang mga ini nagpangayo sang Police assistance sang natabo ang pagkuha sang ila amay.
Kahapon sang aga ginpadulungan sang mga bata sang biktima ang Police Station 4 agud magpabulig nga matumod kun amay nila ang nasapwan bangud blurred ang litrato nga nakapost sa facebook apang ang panapton sang biktima ang parehas sa ginasuksok sang ila amay sang ini ang gin-abduct.
Suno kay Gohee, gintawgan niya ang imbestigador sang Himamaylan Municipal Police Station kag nagpangayo sang spot kasubong man sang clear picture sang biktima.
Natumod naman sang mga kabataan ang bangkay nga amo ang ila amay.
Padayon pa nga ginatumod sa karun ang motibo sa pagpatay kay Ortega.
Ini ang bulag sa asawa kag may yara kaso nga Domestic violence.
