Nagapadayon sa karun ang bilateral meeting ni US President Donald Trump kag Russian President Vladimir Putin sa Alaska.
Pasado alas 3:00 sang kaagahon, oras sa Pilipinas, nag-abot sa Joint Base Elmendorf-Richardson sa Anchorage, Alaska ang duha ka Presidente.
Personal nga nag-shake hands ang duha ka pinuno pagpanaog pa lamang sang mga ini sa ila mga eroplano kag naglakat sa red carpet nga ginlatag para sa ila.
Sa airport, wala nagsabat si Putin sa pamangkot sang mga journalists sa airport kun mapasugot ini sa isa ka ceasefire ukon indi.
Sang ginpamangkot ini kun untaton na sang Russian ang pagpamatay sang mga sibilyan, nagsignal indi nga indi siya makabati sang pamangkot.
Gin-updan naman sang Russian President si Trump sa iya presidential limo kadungan sang ila pagbiya sa tarmac kag pagpadulong sa meeting.
Ang nasambit nga tikang ang makabig nga unusual, partikular na sa tunga sang ginakabig rival nga mga pungsod.
Sang 2018, luyag kuntani ni Trump nga updan siya ni North Korean dictator Kim Jong Un sa salakyan sa ila meeting sa Singapore apang wala ini ginpahanugutan.
Suno sa White House, indi one-on-one ang nasambit nga meeting bangud makaupod diri sanday Secretary of State Marco Rubio kag special envoy Steve Witkoff.
May matabo man nga post-meeting lunch nga pagatambungan nanday Rubio, Witkoff, Treasury Secretary Scott Bessent, Commerce Secretary Howard Lutnick, Defense Secretary Pete Hegseth kag Trump’s chief of staff Susie Wiles.
Ang sentro sang nasambit nga summit amu ang pagpauntat na sang gyera sa tunga sang Russia kag Ukraine.
