Gin-athag sang General Manager sa Central Negros Electric Cooperative (CENECO) nga may ara sang dako nga pagnubo sa bill sang kuryente para sa subong nga Desyembre nga konsumo.
Sa interview sang Bombo Radyo Bacolod kay Atty Arnel Lapore, P0.97 per kilowatt ang ginnubo sa presyo kun sa diin ang anay P11.74 per kilowatt nga rate ang sa karun nangin P10.77 per kilowatt na lamang.
Paathag sini nga ini ang magareflect sa reading nga Desyembre 20 tubtob 26, nga may due date nga Desyembre 30 tubtob Enero 2.
Apang sa pihak sang pagnubo, aminado si Lapore nga mahimo may iban nga indi makabatyag sang pagbag-o bangod sa masami nagadako man ang konsumo sa kuryente kun Desyembre bangod sa mga events kasubong man sa paggamit sang mga christmas lights.
Pahanumdom na lamang sang CENECO General Manager nga maghalong sa paggamit sang mga Christmas lights kag patyon na lamang sa tungang gab-i agud luwas sa pag-overheat partikular sa mga substandard nga produkto.
Pasalig ni Lapore nga may bastante nga supply sang kuryente sa Desyembre 25 kag 31 samtang wala sang malauman nga major brown out bangod wala man sang ginabantayan nga weather disturbances.
Ginalauman man sini nga ang tanan ang mag enjoy sang malinong kag masadya nga bag-ong tuig.
